martes, 8 de decembro de 2015

Culturgal 2015 en imaxes

Stand de Urco deste ano

Atendendo o 'back-stage'

Sesións de sinaturas

Boa xente facendo o mal...

As dúas triloxías de fantasía en galego

Hostal Norte con outros títulos de Alcaian

As Crónicas de Bran no seu andel


O Volume 8 da revista 'Contos Estraños' no que colaboro
co relato 'O derradeiro encargo do vendedor de denociñas'

Falando coa xente que se achegaba ao stand

Reunión coas empresas do audivisual para analizar a
viabilidade de lle dar 'vida' a Hostal Norte


luns, 27 de xullo de 2015

Feira do Libro de Rianxo

Eis o resumo fotográfico do que deu de si a Feira do Libro de Rianxo deste ano 2015. Máis unha vez, foron uns días marabillosos cheos de actividades culturais e de bos ratos compartidos coa corporación municipal e coa xente que traballa na Biblioteca Municipal.









xoves, 2 de xullo de 2015

'O solpor dos deuses' no Taboleiro do libro galego (Xuño 2015)

Os dous anos pasados fora unha marabillosa sorpresa aparecer no Taboleiro do libro galego, elaborado pola web literaria 'Caderno da crítica' de Ramón Nicólas, cos primeiros volumes da triloxía. Onte, tres meses despois de sacalo ás librarías, 'O solpor dos deuses' figura como un dos libros máis vendidos no mes de Xuño no apartado de literatura xuvenil. Grazas a tod@s @s que o facedes posible ;-)

'O solpor dos deuses' no Taboleiro de Xuño 2015

xoves, 25 de xuño de 2015

As primeiras presentacións d'As Crónicas de Bran deste verán

Esta pasada fin de semana viaxamos até o Sur para presentar a nosa triloxía. O Venres polo serán estivemos en Vigo onde, despois de padecer unha viaxe en coche a máis de 35ºC, tivemos a sorte de coñecer a Sabela González, a creadora das Crónicas de Landereina, e volver a pasar un bo rato cos nos amigos da Libraría Cartabón.
Aló nos sentamos, Fernando M. Cimadevila e máis eu, para contar as liñas xerais da nosa historia e os seus protagonistas, dando unha visión completa dos tres volumes que conforman a aventura de Bran e a súa evolución desde que era un mozo a piques de alcanzar a maioría de idade até se converter na figura máxica á que o empurrara o seu destino. Falamos tamén da literatura fantástica en xeral, do seu momento actual e do papel que xogan escritores, críticos e lectores na complicada tarefa de lle dar vida a un libro.

O Sábado, despois de pasar unha noite chea de calor e dos recordos da tortilla, da orella, do xamón asado e da fabada (si, fabada) da cea, bordeamos toda a ría para chegar a Reboreda (a pouca distancia de Redondela) e visitar a Libraría A Carambola.
Foi unha charla moi especial por dous motivos. Porque era a nosa primeira vez n'A Carambola e sempre fai ilusión estrearnos nun lugar novo e polo público que nos acompañou. Sempre falo da segunda lectura e o trasfondo que teñen as Crónicas de Bran. Sempre fago fincapé na crítica social e nos dramas que viven nas almas dos protagonistas da triloxía, tan máxicos mais tan semellantes a nós. Porén, non podo negar, que é unha historia de fantasía épica e que, polo tanto, o seu público principal é o xuvenil. Por iso, estar sentando diante daquelas mozas e mozos e explicarlles o porqué da triloxía, as súas orixes e influencias e, sobre todo, a importancia de poder escribir sobre o que nos define, sobre as nosas tradicións e mitos, foi realmente gratificante.
 
 
En resumo, unha moi boa fin de semana chea de literatura, pizzas, calor, fabada... e conversas nocturnas cos amigos na terraza baixo a luz da Lúa, Venus e Xúpiter. Que máis se pode pedir
 
 

domingo, 22 de marzo de 2015

'O solpor dos deuses' en KindleGarten

Tomás Rivera xa nos ten moi mal acostumados polo marabilloso trato que nos da, a todo o equipo que facemos 'As Crónicas de Bran', na súa web literaria KindleGarten. Eis a recensión do derradeiro volume da triloxía. Aquí tedes todo o que podedes agardar de 'O solpor dos deuses'

xoves, 19 de marzo de 2015

Concerto histórico, 'Rianxo na Belle Epoque'

Hai cousa de un par de meses, José Luis do Pico Orjais propúxome un proxecto ben fermoso. Este home da Arousa, residente en Rianxo e mestre e responsable da biblioteca do CEIP Brea Segade da miña aldea, Taragoña, converteuse desde hai un tempo nun compañeiro de colaboracións artísticas moi querido pola miña parte. Grazas a el, As Crónicas de Bran acharon un oco na biblioteca e na vida cultural de Taragoña e Rianxo e, desde logo, non hai cousa que máis guste que ser coñecido no teu berce por esta tolería de escribir historias na que, de cando en vez, me deixo engaiolar.
O primeiro contacto foi por medio dunha mensaxe de Facebook na que me comentaba algo sobre unha investigación que estaban a levar a cabo para recuperar certos fondos musicais. Aproveitando que non iamos tardar en facer unha visita á vila, quedamos para tomar un café (el, eu tomei unha birra) no Memphis e falar do tema. Tal e como me adiantara, o asunto era que acharan unha partitura do que viña a ser unha valsa de principios do século XX (en plena Belle Epoque rianxeira) e estaban a lle facer uns arranxos para interpretala con guitarra e flauta. A proposta non podía ser máis interesante, escribir un texto para ler no concerto histórico coa melodía soando de fondo.
Nun primeiro momento pensei en algo similar á letra dunha canción mais para ser interpretada a xeito de narrativa e, certamente, esa foi a idea que rematou por se facer realidade.

Hoxe atopei (nesta rede de redes) o cartaz do evento e quería compartirlo con todos vós (eses seres estraños que vos deixades caer por aquí). Deixovos, tamén, o video que gravaron nas rúas de Rianxo e no que se pode escoitar a fermosa peza que leva como título o nome da vila e que tentarei non estragar demasiado co meu texto (xa volo subirei ao blogue despois do concerto).


luns, 9 de marzo de 2015

Fotos da presentación de 'O solpor dos deuses'

Como viñemos 'spameando' toda a semana pasada, este Sábado fixemos a presentación do derradeiro volume da triloxía 'As Crónicas de Bran'. Foi unha reunión, principalmente, entre amigos e familia na que, ademais de celebrar o meu aniversario, falamos do terceiro volume da saga e da literatura fantástica en xeral.
Grazas ao meu compadre, Miguel González, aquí tedes as mostras gráficas do evento...





















venres, 6 de marzo de 2015

'Hostal Norte' aparece no Sermos Galiza

Onte foi un deses días nos que, furtiva e silandeiramente, un dos meus pequenos fillos ocupan un espazo no escaparate cultural de este país. Foi no xornal 'Sermos Galiza' e o certo é que non nos puideron tratar mellor. Obrigados polas súas palabras.




venres, 27 de febreiro de 2015

Conta atrás: oito días

Pasaron oitos meses desde que actualicei por última vez o blogue d'As Crónicas de Bran. Oito meses é moito tempo e, aínda que non dou co verdadeiro motivo, seguro que algo pasou pola miña cabeza para que o deixase tanto tempo de lado. Ben, o feito, feito está e xa non se pode volver atrás. Aínda así, sinto que lle debo unha desculpa e vou transcribir aquí (neste meu novo e tamén mal atendido sitio) o que nel escribín:

Somos animais de costumes e faremos a presentación do terceiro libro como ven sendo habitual: no aniversario de Duncan e no bar de un amigo. Repetiremos a festa do ano pasado e será no Passepartout Beerhouse d'A Coruña o Sábado 7 de Marzo ás 20:30. Xa preparamos a música que poñeremos de fondo (tamén repetiremos o disco 'Avalon' de Sully Erna para crear ambiente) e, xa postos a repetirnos, Leo preparará a súa famosa e deliciosa tarta de Guinnes.

Xa non queda nada para telo nas mans. Quedará un pouco máis para que vexa os andeis das librarías porque, se acontece o de anos anteriores, pasará un mes e medio antes de que o Consorcio o poña en distribución. Mais só desexamos que, aqueles poucos e poucas que agardades a súa chegada, non vos sintades decepcionados con este derradeiro tramo da nosa viaxe e que gocedes tanto como nós o fixemos. Que gocedes con esta aventura que, ao tonto, estendeuse por máis de dous anos desde que se comezou a escribir 'A revolta dos Mestres'.

Pasaron moitas cousas desde aquela primavera do 2012 na que se teclearon as primeiras frases da triloxía. Moito traballo "artístico" de creación de textos e ilustracións, moitas reunións para poñer en orde o material, ducias de presentacións e asistencias a Feiras do Libro (sobre todo o primeiro ano, aquel frenético 2013) e, por descontado, centos de horas para escribir ese case milleiro de páxinas que compoñen as Crónicas.

Chega o que é o máis escuro e triste dos tres libros. 'O Solpor dos Deuses' é o final da triloxía, si, mais tamén é o destino polo que loitaron os nosos protagonistas. Neste volume fálase da sorte que correu o Mestre Reloxeiro na súa Lúa Metálica (nese maquiavélico Artefacto de Cronos) e que maldades está a argallar a súa mente atormentada. Asistiremos ao remate desa estraña alianza formada polo Solla e por Bran e, desde un lugar privilexiado, contemplaremos a decadente civilización rexida pola Sacerdotisa e o seu amante, ese Dragón Vermello cada vez máis humano. Tampouco faltarán a esta cita os deuses que nos acompañaron desde o principio. Donn terá que enfrontarse á profecía que adiantaba a súa morte baixo as escuras ás dun paxaro de morte e Môrrigan non acaba de atoparse cómoda (nin realizada) no seu papel de deusa da guerra. Curuxa, o Navegante, Patrick... vellos coñecidos que nos mergullarán en violentas batallas contra o exército de mecanos de Cronos e contra as tropas da Terra da Nada, comandadas de novo por Lord Daru. Hai moito máis dentro das súas páxinas pero iso será algo que vos toca descubrir a vós.

Así que xa está. Só nos queda tomar aire e pararnos a pensar. Pensar se este ano volveremos encher a axenda con presentacións e visitas ás librarías e ás feiras, se aínda temos forzas para darlle a despedida que merece a esta historia que encheu os nosos soños durante case tres anos. Se as temos e vós queredes, verémonos no camiño.

mércores, 25 de febreiro de 2015

Conta atrás: 10 días

Un solpor sempre remata coa luz devorada polo fusco, varrida polas tebras que escorregan alén do firmamento, nesa fervenza infinita que é o Cosmos.
Esa mesma escuridade afoga a alma da Curuxa que, cruzando as brétemas de Annwn, voa até o noso mundo para liberar a Bran do feitizo que o mantén prisioneiro.
Chega o final de unha era, do tempo no que os deuses dominan Alba. Mentres os ríos ardentes caen desde os ceos, e a serra e o mar son devorados polas lumaradas, o espertar dos Cristais decidirá o destino da humanidade.

Chega a hora de deixar paso á escuridade mais, antes de que as tebras asolaguen o mundo, a Terra de Alba vivirá un auténtico inferno. Milleiros de pictos desaparecerán baixo a chuvia de lume do Destrutor, dese inmenso navío creado polo Mestre Reloxeiro. Se a morte é o noso único destino, tentemos chegar a el sen padecer máis dor da que poidamos soportar.

'O solpor dos deuses' - As Crónicas de Bran vol.3


xoves, 22 de xaneiro de 2015

Hostal Norte na Radio Galega

Foi esta unha semana chea de sorpresas. Por unha banda, rematabamos de coñecer que As Crónicas de Bran volvía aparecer entre os mellores libros do 2014 de LIX, no apartado de Mellor Portada e no de Mellor Libro, na enquisa organizada pola web Fervenzas Literarias; por outra banda, Hostal Norte continuou co apoio da crítica, por parte de Ramón Nicolás, e estaba entre as recomendacións literarias do número de Xaneiro-Febreiro da revista de Biblos Clube de Lectores. Non quedou aí a cousa e, despois da tentativa frustrada de facer unha entrevista coa TVG (principalmente por problemas de encaixar axendas por mor dos meus horarios de traballo), recibín unha chamada da Radio Galega para que Hostal Norte formase parte do apartado de narrativa do programa Diario Cultural. A nosa aportación consistiu na lectura de cinco páxinas da novela que se emitiron de Luns a Mércores en pequenos fragmentos de un minuto e, ademais, unha entrevista na que contei (o mellor que souben) de que trataba esta historia de terror psicolóxico e respondín ás preguntas que Xiana Arias tivo a ben a me facer. A gravación fíxose ás 12:00 do Martes e, malia que preparei unhas respostas 'tipo', a conversa transcorreu dun xeito natural e nada forzado. Falei do que era o Hostal, como construín os personaxes que comparten as súas vidas e cuartos con Brais dentro de ese edificio inquedante e o sentido das dúas liñas narrativas principais, a historia 'real' de Brais na súa estancia no hostal e os pesadelos dos capítulos oníricos. Case ao final da entrevista collín velocidade e lanceime a spoilear un chisco o significado do capítulo catro, o das ratas e a crisálide. Afortunadamente, ese fragmento quedou fóra da gravación final e os ouvintes non tiveron que escoitar os meus desvaríos sobre ratas copulando e libráronse de coñecer detalles que é mellor que descubran por si mesmos coa lectura da novela.
Para que quede constancia do meu paso polo programa, aquí van as ligazóns aos 'podcasts' de cada un dos días, coa referencia ao minuto:segundo no que aparece a lectura e máis a entrevista.


venres, 16 de xaneiro de 2015

Fervenzas Literarias: o mellor do 2014

Como cada ano, a web 'Fervenzas literarias' lanzou a súa enquisa para escoller aos mellores da literatura galega. Desde editoriais e críticos, até cada un dos diferentes xéneros, todos tiveron o seu recoñecemento nestas votacións. O ano pasado acadáramos, co primeiro volume das Crónicas de Bran, a segunda posición como mellor portada LIX (Literatura Infantil-Xuvenil) e a sétima posición como mellor novela LIX. Este ano, a portada do segundo volume, A porta de Annwn, chegou á terceira posición e a novela quedou en sexto lugar. Non podo explicar o 'subidón' que isto significa. Contamos historias nun xénero, a fantasía épica (máis ben un subxénero), minoritario e só loitamos coas nosas forzas e a nosa ilusión e estar no grupo de mellores obras publicadas durante o pasado ano é un premio que nos fai pensar e crer que o que facemos, e todo canto sacrificamos para facelo, paga a pena. Só podemos dicir unha cousa, grazas, grazas de corazón.


mércores, 14 de xaneiro de 2015

Entrevista na web 'Vivir na Coruña'

Hoxe fago unha curta entrada nesta a miña bitácora. Ás 20:00 horas teremos unha cita no 'Linda Rama', un novo café-libraría d'A Coruña, para falar de Hostal Norte e pasar un bo rato coa xente que até aló se queira achegar a escoitar as nosas historias. Por outra banda, quero deixar a ligazón a unha entrevista que tivo lugar esta semana e que foi a primeira 'in person' na que participei. Foi realizada pola xente de 'Vivir na Coruña', unha web local especializada na cultura que latexa nesta cidade, e que quero compartir con vós.